Latest News
തിരുവനന്തപുരം : കൈറ്റ് വിക്ടേഴ്സ് വഴിയുള്ള ഫസ്റ്റ് ബെല്ലില്‍ തിങ്കളാഴ്ച മുതല്‍ പ്ലസ് വണ്‍ ക്ലാസുകളും ആരംഭിക്കും.ഇതനുസരിച്ചുള്ള പരിഷ്കരിച്ച സമയക്രമം കൈറ്റ് പ്രസിദ്ധീകരിച്ചു. രാവിലെ 7.30 മുതല്‍ ഒമ്പത് വരെ ദിവസവും മൂന്ന് ക്ലാസുകളാണ് പ്ലസ് വണ്‍ വിഭാഗത്തിനുള്ളത്.ഇവയുടെ പുനഃസംപ്രേഷണം അതേദിവസം വൈകീട്ട് ഏഴ് മുതല്‍ 8.30 വരെയും രണ്ടാമത്തെ ചാനലായ കൈറ്റ് വിക്ടേഴ്സ് പ്ലസില്‍ പിറ്റേ ദിവസം വൈകീട്ട് 3.30 മുതല്‍ അഞ്ച് വരെയും ആയിരിക്കും.
പ്രീ പ്രൈമറി വിഭാഗത്തിലുള്ള കിളിക്കൊഞ്ചല്‍ രാവിലെ 11നും ഒമ്പതാം ക്ലാസ് രാവിലെ 11.30 മുതല്‍ 12.30 വരെയും (രണ്ട് ക്ലാസുകള്‍) ആയിരിക്കും. ഒമ്പതാം ക്ലാസ് കൈറ്റ് വിക്ടേഴ്സ് പ്ലസില്‍ അടുത്തദിവസം ഉച്ചക്ക് ഒന്നുമുതല്‍ രണ്ടുവരെ പുനഃസംപ്രേഷണം ചെയ്യും.
പ്ലസ് ടു ക്ലാസുകള്‍ രാവിലെ ഒമ്പത് മുതല്‍ 11 വരെയും 12.30 മുതല്‍ ഒന്നര വരെയും ആയി ആറ് ക്ലാസുകളാണ് ദിവസവും സംപ്രേഷണം ചെയ്യുക. ഇവയുടെ പുനഃസംപ്രേഷണം കൈറ്റ് വിക്ടേഴ്സില്‍ രാത്രി 8.30 മുതലും കൈറ്റ് വിക്ടേഴ്സ് പ്ലസില്‍ പിറ്റേദിവസം വൈകുന്നേരം അഞ്ച് മുതല്‍ എട്ട് വരെയുമായിരിക്കും.
ഒന്നുമുതല്‍ ഏഴുവരെ ക്ലാസുകളും പത്താം ക്ലാസും നിലവിലുള്ള സമയക്രമത്തില്‍തന്നെ സംപ്രേഷണം തുടരും. ഉച്ചക്ക് 2.00, 2.30, 3.00, 3.30, 4.00, 4.30, 5.00 സമയങ്ങളിലാണ് യഥാക്രമം 1, 2, 3, 4, 5, 6, 7 ക്ലാസുകളുടെ സംപ്രേഷണം. കൈറ്റ് വിക്ടേഴ്സ് പ്ലസില്‍ അടുത്തദിവസം രാവിലെ 9.30 മുതല്‍ ഒരുമണി വരെ ഈ ക്ലാസുകള്‍ ഇതേ ക്രമത്തില്‍ പുനഃസംപ്രേഷണം ചെയ്യും.
പത്തിന്റെ മൂന്ന് ക്ലാസുകളുടെ സംപ്രേഷണം വൈകുന്നേരം 5.30 മുതല്‍ ഏഴ് വരെയാണ്. ഈ ക്ലാസുകള്‍ അടുത്തദിവസം കൈറ്റ് വിക്ടേഴ്സില്‍ രാവിലെ ആറ് മുതല്‍ 7.30 വരെയും കൈറ്റ് വിക്ടേഴ്സ് പ്ലസില്‍ രാവിലെ എട്ട് മുതല്‍ 9.30 വരെയും പുനഃസംപ്രേഷണം ചെയ്യും.
സ്കൂളുകളില്‍ ഉച്ചക്ക് ശേഷവും റെഗുലര്‍ ക്ലാസുകള്‍ ആരംഭിക്കുന്ന ഘട്ടത്തില്‍ സമയക്രമത്തില്‍ വീണ്ടും മാറ്റം വരുത്തുമെന്ന് കൈറ്റ് സി.ഇ.ഒ കെ. അന്‍വര്‍ സാദത്ത് അറിയിച്ചു. ഇംഗ്ലീഷ് മീഡിയം പ്രത്യേകം ക്ലാസുകളും സംപ്രേഷണം ചെയ്തുവരുന്നുണ്ട്. ക്ലാസുകളും സമയക്രമവും ഫസ്റ്റ് ബെല്‍ പോര്‍ട്ടലായ www.firstbell.kite.kerala.gov.inല്‍ ലഭ്യമാണ്.
The post കൈറ്റ് വിക്ടേഴ്സില്‍ പ്ലസ് വണ്‍ ക്ലാസുകള്‍ ഇന്നുമുതല്‍ first appeared on Keralaonlinenews.from Keralaonlinenews https://ift.tt/3xyNrRR
via IFTTT
No comments